Apel për ndërgjegjësim në Ditën Botërore të Talasemisë: Rasti i Klodianës dhe vajzës së saj 9-vjeçare
Dhjetë vite më parë, Klodiana Gjini dhe bashkëshorti i saj nuk e kishin imagjinuar se fëmija i tyre do të lindte me talasemi, një çrregullim i trashëguar i gjakut që kërkon transfuzione të përhershme. Gjatë planifikimit të shtatzënisë, të dy rezultuan mbartës të kësaj sëmundjeje, por sipas saj, mjeku i kishte siguruar se shanset për një fëmijë me talasemi ishin të ulëta. Në realitet, ndodhi e kundërta.
Sot, vajza e tyre 9-vjeçare ka nevojë të vazhdueshme për transfuzione gjaku për të mbijetuar. Në Ditën Botërore të Talasemisë, Klodiana i bën thirrje çifteve të reja që të kryejnë të gjitha ekzaminimet dhe konsultimet e nevojshme para se të sjellin në jetë një fëmijë.
Në Shqipëri, aktualisht janë 350 pacientë që vuajnë nga talasemia. Edhe pse gjatë dy viteve të fundit nuk është shënuar asnjë humbje jete apo lindje e re me këtë sëmundje, nevojat për gjak mbeten të vazhdueshme.
Talasemia, e njohur ndryshe si anemia mesdhetare, është një sëmundje gjenetike e përhapur kryesisht në zonat mesdhetare dhe kënetore. Sipas ekspertëve të gjenetikës, nëse të dy prindërit janë mbartës të sëmundjes, pa pasur vetë shenja klinike, ekziston një mundësi 25% që fëmija të lindë me talasemi.
